الشمس بتلفظ اخر نفس
هونيك بوقت الغروب
والدموع بالعين بتنحبس
والشموع بتبكي وبتدوب
هونيك بموت اخر امل
هونيك الفرح مسلوب
و الضحكات كلا بتنقتل
و بتتحجر كل القلوب
هونيك بتغرق السفينة
و بتضيع كل الدروب
هونيك النهاية حزينة
وكل يوم الحب مغلوب
هونيك الموسيقى بتختنق
و الصوت بيصير يموت
هونيك الالوان بتحترق
و الكون رعد و سكوت
هونيك بتوقع احلا نجمة
بتسقط بالبحر بتنطفي
هونيك بتغص حتى الكلمة
و كل الاماني بتختفي
الشمس لفظت اخر نفس
هونيك ماتت مع الغروب
و الدموع مللت تنحبس
و فاضت فيها الدروب...
No comments:
Post a Comment